Il-grupp jiltaqa’ l-ajruport fil-6am minn fejn fit-08.15am permezz ta’ titjira tar- Ryanair nitilqu għal Bari u naslu 09.35am. Mal wasla tagħna immorru għas-smiegħ tal-quddiesa, ninvistaw l-English office fejn niġu mbierka b’waħda mill-ingwanti li kienu jmissu mal-pjagi mirakulużi ta’ Patri Piju. Wara mmorru nagħmlu l-Via Crucis Monumentali u ninvistaw il-mużew. Naslu il-lukanda Rosamarina fejn nagħmlu sistemazzjoni fil-kmamar. Ċena fil-lukanda.

Wara l-kolazzjon nitilqu għall-belt ta’ Pietrelcina, post zgħir u ħelu fejn Patri Piju twieled u għex sakemm kellu 31 sena. Naraw postijiet konnessi ma’ Patri Piju, fosthom il-knisja parrokkjali fejn qaddes l-ewwel quddiesa. Ikolna quddiesa fil-knisja tas-Sagra Familja u naraw mużew iehor ta’ Patri Piju. Wara l-ikel (extra) immorru Pjana Romana fejn kien ħa l-pjagi invisibbli.

Jittieħed l-kolazzjon u wara nitilqu għall-belt ta’ Lanciano. F’Lanciano inżuru s-Santwarju tal-Miraklu tal-Ewkaristija fejn juri l-Ġisem u d-Demm ta’ Kristu. Dan il-Miraklu seħħ 1200 sena ilu u għadu jidher sal-lum. Hawnhekk ikollna ċ-ċelebrazzjoni tal-quddiesa. Qabel nirritornaw San Giovanni Rontodo mmorru nieklu (extra). Kif naslu l-lukanda jkollna l-ħin biex immorru u naraw fid-dettal il-knisja l-ġdida u moderna ta’ San Pio ta’ Pietrelcina, lis-sptar minn barra “La Casa Sollievo della Sofferenza” u l-kwartieri tal-laqgħat ta’ talb ta’ Patri Piju. Ċena fil-lukanda.

Wara l-kolazzjon immorru bil-kowċ lejn Monte Sant’Angelo u Foggia. F’Monte Sant’Angelo hemm l-Għar u s-Santwarju ta’ San Mikiel Arkanglu. Hawnekk sa niċċelebraw il-quddiesa u jkollna ċans biex naraw dan it-tempju qaddis. Din il-Bażilika/Santwarju bħalissa qegħdin jieħdu ħsiebha l-Kongregazzjoni Mikelini li huma ta’ oriġini Pollakka. Ħin liberu qabel ma nitilqu għal Foggia. Hawnhekk ser nżuru l-Bażilika tal-Madonna d’Incoronata fejn wara jkolna ċans biex nidħlu f’ċentru kummerċjali.

Wara il-kolazzjon naqbdu it-triq lejn Gioia del Colle. Matul il-vjaġġ tagħna nagħmlu waqfa ġewwa Matera. Matera hija famuża għas-Sassi, id-djar antiki fil-għerien minquxin fil-blat tal-ġebla tal-franka. Hemmhekk se jkollna żjara gwidata ta’ din il-belt storika. Naslu fil-lukanda Svevo u jkollna sistemazzjoni tal-kmamar.

Wara l-kolazzjon, nitilqu għal eskursjoni ta’ ġurnata sħiħa lejn Polignano a Mare u Monopoli. L-ewwel waqfa tagħna tkun Polignano a Mare, raħal kostali pittoresk magħruf għall-irdumijiet spettakolari tiegħu u l-baħar kristallin. Aktar tard, inkomplu l-vjaġġ tagħna lejn Monopoli, belt affaxxinanti mal-baħar b’port antik u belt storika mimlija toroq dojoq u bini storiku.

Wara l-kolazzjon, nibdew il-ġurnata b’żjara f’Alberobello, sit ta’ Wirt Dinji tal-UNESCO, magħruf għad-distrett uniku tat-trulli bid-djar bojod bis-soqfa koniċi karatteristiċi. Se jkollna mixja gwidata li matulha niskopru din il-belt pittoreska. Il-mixja tkun pjaċevoli hekk kif nitilgħu Via Monte Michele, u jkollna wkoll l-opportunità nżuru l-knisja tat-trullo tas-seklu 20 ta’ Alberobello, il-Knisja ta’ Sant’Antoni.Wara nofsinhar, jkollna waqfa f’Ostuni, magħrufa l-aktar għall-belt il-qadima tagħha miżbugħa kollha bl-abjad.

Wara l-kolazzjon nitilqu lejn Bari. Matul il-vjaġġ tagħna nagħmlu żjara qasira fil-villaġġ pittoresk ta’ Locorotondo, meqjus bħala wieħed mill-aktar irħula sbieħ fl-Italja. Wara nkomplu il-vjaġġ tagħna lejn Bari, il-belt kapitali tar-Reġjun ta’ Puglia u għandha port antik fil-baħar Adrijatiku. F’Bari nimxu sal-belt il-qadima u ċ-ċentru storiku fejn nistgħu naraw il-Bazilika ta’ San Nikola u l-Katidral ta’ San Sabinu. Imbgħad naqbdu l-kowċ biex immorru l-ajruport ta’ Bari biex fl-10pm nitilqu fir titjira tar-Ryanair li twassalna Malta fil-11.20pm